《十萬個為什麼 之 霍震霆有咩做？》
索契冬奧代表、短道滑速選手呂品韜近日投訢，曾多次提出要求隊醫同行，但港奧委會以「港隊名單已滿」拒絕。(冬奧香港代表團名單有7人，除呂品韜之外，有教練呂碩及滑冰聯盟主席葉小燕，隨團出發仲有香港奧運代表團團長王敏超、港協暨奧委會會長霍震霆、義務秘書長彭沖和職員周景勳。)
討論應唔應該有隊醫同行之前呢，其實我好想知個7個人各自有咩job duties 架？
7個人去，咁個參賽者就實有得去啦。教練要教個參賽者，佢都要去啦。然後，滑冰聯盟主席葉小燕，呂品韜話小燕有協助佢比賽，咁佢都要去啦。團長都要去嘅，佢要做當地聯絡，去旅行團都要有個人帶啦。
咁最後3個人，佢地都係來自港協暨奧委會，佢地分別係會長霍震霆、義務秘書長彭沖和職員周景勳。
港協暨奧委會到底有咩做？出於好奇心，我上左佢個網，不如我地分析下個9項宗旨：
宗旨
1、在香港推動公眾對體育運動的興趣；
2、推動民意，爭取社會人士支持來促使政府增設更多完善的體育設施，供各運動員使用;
3、審批及執行劃一的法規，藉此鼓勵及監管香港的體育活動，並處理任何違例事件，以及協調或仲裁體育總會或組織之間的爭議。
4、協調所有本地體育組織，推動「全民運動」，並鼓勵香港市民每天積極參與三十分鐘的健體運動。
5、與矢志推廣國際體育競技活動的世界性或個別地區組織結盟。
6、提倡奧林匹克精神 ─ 透過運動建立跨越國界和種族的友誼。
7、籌備國際體育賽事及鼓勵更多香港運動員參與。
8、審批代表香港參加奧林匹克運動會、亞運會、東亞運動會及所有其他地區及國際性運動會的代表團人選，以及全權負責決定關於香港代表隊的事宜。
9、執行所有其他合法的連帶或有關行動，以實現上述使命及宗旨。
12345、7-->其實唔使係俄羅斯做架喎。
6-->好深層次喎，係俄羅斯做唔做到架？
8-->得一個人參賽，係咪唔使係俄羅斯審批架？
9-->係唔係conclude 1-8 咁解？
咁其實佢地3個去到俄羅斯有咩做架？佢3個做嘅野有咩唔同架？(定冇唔同架，只係高層，中層同低層咁解？)我真係唔係串佢地架，次次睇新聞都好想知港協暨奧委會有咩做？係唔係安排接受訪問？(但唔安排，TBB係咪都會照行埋去架？)
「彭沖表示，去年12月4日才得知有一名運動員入選，強調運動員隨團人數由國際奧委會規定。」到底係人數有規定，定還是咩人去都有規定？
到底係唔夠位定唔夠錢？
如果唔夠位：其實霍震霆平時除左交代郭晶晶近況之外，有咩做架？隊醫有冇得好似踼波咁後備頂替霍震霆出賽架？
如果係唔夠錢：有人話都冇獎拎，又得一個人參賽，要政府比錢的話，好哂錢。咁其實比新移民遊學哂錢D，定比隊醫陪呂品韜出賽哂錢D？同埋如果唔夠錢，其實係Facebook籌募經費，我都會夾一份架喎。
PS. 如果港協暨奧委會冇咩做呢，我都想做喎，請唔請人呀？
(圖片來源：中國香港體育協會暨奧林匹克委員會（港協暨奧委會）網站：http://www.hkolympic.org/mission.php)
原文載於「姐死姐還在」Facebook 專頁：
https://www.facebook.com/photo.php?fbid=207583136116700&set=a.1647015237...