好耐之前同友人去旺角食飯後，就到行人專用區到欣賞一班對我黎講係不知名樂隊嘅表演，行一轉已經發現有唔少形形式式唔同種類嘅表演者係到表演佢地嘅才能，有唱歌，有雜技。我敬佩佢地敢企出街頭做自己鐘意做嘅野，同時都敬佩佢地敢係人眾面前表演，因為依樣係需要好大勇氣同自信，你問我得唔得，我都要諗過下先可以答到你。
眼見依撻地方百花齊放，埋藏一個表演者完成自己夢想嘅機會，我同友人講:『依個地方可以建立自信心，發揮所長嘅地方，比一班低自信或有缺憾嘅人訓練佢地專長，係人眾面前表演，觀眾所拍出嘅掌聲，充滿激情嘅鼓勵說話，係比到一個好大信心比佢地改變佢地人生。』
當我同友人望住班表演者時，我地腦海都係到諗一班充滿夢想嘅後生仔如果係到表演，個埸面應該幾正。
然而，今早睇到一則新聞，『聾人協進會旺角表演Beatbox 被指阻人搵食』，再睇到一班組員表演時，被3L樂隊(而我不知道3L樂隊是誰)惡意批評，咩係咪玩野，傷殘人大晒呀?、聾人就大晒呀?、阻住人搵食等說話。
估唔到一個小小嘅活動都要受盡白眼，雖然我唔係現埸，但我好明白組員企上街頭個份勇氣絕對唔易有，自身有缺憾嘅人唔多唔少都影響到個人自信心，一個低自信嘅人會覺得自己咩事都做唔到，仲要練Beatbox依D咁高難度嘅野，你地會覺得係一件易事?
從佢地報名參加，面對自身缺憾同不足條件下仍然試下學習高難度事物，透過導師不斷鼓勵不斷練習先有一份敢企出黎表演嘅勇氣。
然而得出嘅結果竟然係咁......批評班人嘅所謂表演者知唔知依份傷害有幾大? 受盡白眼嘅佢地知唔知內心有幾傷? 佢地係聾人，聽唔到你地講咩，但眼見現埸人士嘅兇狠樣，導師無奈，歌手喊掉，你估佢地當時心情同諗緊咩? 佢地會諗自己係咪有問題，係咪唔應該出現係依個地方到，即使手語導師講解件事比佢地聽，但傷害已經狠狠咁刺入佢地心中，依份傷害隨時造成陰影......
曾經同一班學生練習魔術表演，要係某學校活動作一個短短幾分鐘表演，正所謂台上一分鐘，台下十年功，佢地唔係職業魔術師，面對一個從未接觸，又有難度嘅魔術表演，仲要表演比過百人睇，真係無返咁上下自信都唔敢參與，
佢地好懷疑自己能力，問我:『我真係可以做到? 不如你換人啦! 佢地鐘唔鐘意睇我表演?』
然而我地不斷鼓勵同練習，佢地都投入了，佢地都比當初更用心用力去練習，仲滿心期待表演當晚會係點......最後佢地表演成功，一臉滿足嘅樣令佢地更加勇於去試多唔同嘅野，依份體驗改變佢地往後。
但琴晚班聾人就唔好彩，佢地唔好彩唔係因為自己表演唔好，而係遇上一班"表演者"。
幾撚時開始旺角行人專用區變成諸侯割讓，自封為王? 定係陀地佔領，自定規矩?
成條街最撚嘈最撚霸道就係你地，人地黎唱十幾分鐘就比你地咁樣白眼，分分鐘可以告鳩你地殘疾歧視，唔好用街頭藝術黎包裝自己，成條專用區變哂質，變到不文不類，亳無管制，住附近樓上嘅人就慘，行街嘅人要左閃右避，廢事踩中佢地"影相地盤"，你搵食都忍鳩你，但唔該比少少尊重班組員，你地對佢地造成巨大傷害外，都對一班真心為街頭藝術嘅表演者造成影響，屌!
3L樂隊? 我呸！