中國政府7月1日通過新《國家安全法》，焦點之一係將香港、澳門、台灣人由中國單方面納入《國安法》範圍。喺中國法律實施範圍內，三地人被強加「維護『統一』」嘅義務。 中共先將「國家安全」膨張，將自己一黨專政嘅安全視為比領土、人民福祉有更高嘅地位，而且仲將網上世界明文包括在內，即係，間接令你喺中國境外嘅言行都要計數。
再者，中共使用（或濫用）法律條文嘅方式一向創意無限，唔除排你上網寫兩句要求結束一黨專政或中國民主化都會係「犯罪」，「返大陸」會被人拉嘅風險真係愈嚟愈高。咁唔駛等中國拒絕入境或沒收「回鄉證」，如無必要都唔好入中國境會隱陣啲。 如果唔係澳門中聯辦主任李剛爆料，外界都唔知澳門年青人經香港傘運後對「中國人」身份認同暴跌一半。2014年8月澳門有個建制派社團對年青人都咗個調查，當時有超過九成人認同「中國人」身份，喺同年12月再做一次調查，就發現認同率跌至僅僅過五成。即係話，雖然澳門年青人大多冇直接參與香港傘運，只係齋睇中國政府格硬扭曲《基本法》拒絕俾你有真普選，已足夠令人唔想再認係「中國人」。
習近平2014年12月嚟澳門期間，發言有強調「加強年青人『教育培養』」，之後時不時中國高官嚟到都嗡吓「年青人教育」問題，當時我已有疑問，澳門啲學校建構國族身份方面一向都好有效，澳門年青人普遍未有排斥「中國人」身份，我未明中國高官過嚟澳門將「教育」提完又提？如果唔係李剛爆料，我都唔知到原來澳門年青人對「中國」認同率已經插水。
中國政府扭曲聯合聲明、《基本法》精神，拒絕俾香港、澳門人有真正「當家作主」嘅權利，加上「中國人」對外形像喺國際上的確不討好，所謂「中國人」身份本身已係負資產，依加中共《國法法》仲強加埋「義務」俾你，仲唔係趕客？依加連「返大陸」嘅法律風險都增加，跨境收窄埋言論自由，有足夠理由令港、澳年青一代相信追求命運自主、掌握憲制未來先係出路。所以，中共仲想將「統一大業」義務強加俾「港澳台『同胞』」，都係慳返吧。