我唔知拎呢兩件事比較是否恰當，可能有人話我比喻不倫亂鳩咁嚟，又或者有人覺得我喺受害老人家屬嘅傷口上灑鹽，甚至可能有人覺得我唔係將焦點對準政府嘅政策。
但我只係覺得呢兩件事有好多相似嘅地方。
首先，嚟個案件重溫先……
1. 有個女仔俾補習老師非禮，個老母叫個女忍下先
(LINK: http://news.sinchew.com.my/node/413817)
2. 劍橋虐老院 (唔使俾LINK啦！)
兩件事之中嘅受害人：細路同老人，都係大眾眼中嘅弱勢人士。佢地一係就未識點樣保護自己，一係就再無能力捍衛自己嘅利益，又或者兩樣都中哂。結果就要向可以信任同有能力幫佢嘅人求助。個女當然搵老母幫啦，而我都傾向相信其實劍橋虐老院當中有唔少老人係向屋企人投訴過。
你諗下前幾日無記個「東張西望」訪問班街坊，問佢地知唔知劍橋虐老院嘅服務係點，班街坊個個都好似收過風咁，知道幾多嘢啊！咁你仲會唔會覺得受害老人班家屬個個矇盛盛全不知情大家蒙在鼓裏？咁點解大家唔出聲扮唔知啊？
老母：「他補英文補得好，我的兒子需要人幫他」。(點解變咗個仔？自己睇新聞啦)
家屬：「護老院六星級服務，我父母(最緊要係我)需要有人睇住佢。」
老母：「考好個文憑試先啦，為你好啊!」
家屬：「有護老院啲姑娘睇住你，好過屋企無人幫你，為你好啊！」
老母：「我覺得只是這個老師有少少鹹濕，未去到強姦這麼嚴重。」
家屬：「我覺得間護老院有少少失誤，未去到死人咁嚴重。」
當然係設計對白，我亦都唔係話個個家屬都係咁冷血，肯定有部份家屬真係事發之後好唔開心，但問題係個老母同家屬點解會有咁嘅心態？
老母叫個女忍個單嘢，出發點據佢講係就嚟考試，為咗成績就叫個女忍住先啦！再仆街啲諗就係個老母怕煩，驚第二個補習老師「質素」無非禮個位咁好！
咁班家屬？我諗情況都大致係咁上下，護老院嘅地點、收費、服務質素樣樣都要考慮清楚，你估轉過第二間容易啊？我記得N年前我全家幫阿嫲搵老人院真係全家總動員搵咗幾次先落到決定，你覺得個啲家屬會唔會因為露天除衫而考慮全家再動員多次搵過第二間院？仲有就係，好多人都驚投訴完有手尾跟，唔投訴就少傷啲，投訴咪傷啲囉！
更慘嘅係個女仔由於「閱世未深」一俾人非禮就講出嚟，希望個老母會幫手。但老人家會點諗？「唉！無謂麻煩班仔女囉，而家都無用啦！人老咗係無尊嚴啦！」唯有大事化小囉，你唔講我唔知咪你好我好天下太平囉。
香港呢個社會係好奇怪，人人都識得講人權呢啲大原則，保護兒童、尊重老人呢啲就成日都講架啦。你叫佢平時做吓義工、賣旗幫吓細路同老人就好鬼熱心，但一諗到牽涉自身利益個陣就好難做出明智嘅決定。呢兩件事最本質係乜？你當我幼稚天真又好，入世未深又好，其實最簡單就係性同暴力。用性嚟換取好成績、用忍受暴力嚟換取基本生活，正常人一聽到就識口誅筆伐，但只要加少少其他因素就無辦法解決。
好簡單，平時係街有條痴線佬當街問候你老母，你實好嬲。
但當護老院有條友除你老母衫又或者真係打過佢，但你會「有好多嘢考慮架…」
政府啲老人政策固然要屌，但有時香港人啲思想真係要改變吓。