肥仔懷呢件事（老豆老母都會叫自己個仔做肥仔啦，講到叫人肥仔都係歧視，真係over左），本土派在討論區繼續洗版，話佢係人蛇要立即遣返，左膠見工賊會落水，唔敢出聲，出聲既就只係圍繞人權。
嗰啲所謂左右膠，今次都係用番既定框架去評論，兩邊都離晒地，就事論事，我想講幾點：
1. 肥仔懷阿婆用假證件叫佢入境，其實好大罪，真係坐得監，應該要睇實差佬同律政司有冇鬆章；
2.入境署有責任盡快搵肥仔的阿爸阿媽，法理上，細路跟父母係最好的，除非佢阿爸阿媽死左，就算佢老豆冇左隻腳，阿媽生cancer，中港政府都應送番肥仔去佢父母度。所以有左膠講到話肥仔一定要留港，亦都唔係關心肥仔既說法；
3. 入境處搵佢老豆老母期間，比行街紙係應該的，話遣返，都唔知可以遣返去邊啦，按人權，比行街紙（而非居港權，攞行街紙過七年都唔會有居留權的）時比佢讀書都係應該既。嗰啲一味話要遣返肥仔既，只係將政治派系鬥爭凌駕肥仔權益之上；
4. 但調查都要有個合理時間，唔可以十年八載都話查唔到，對肥仔懷都唔好啦，佢去到十八歲，可以法理上算一個成年人，到時先遣返都合理吖；
5. 佢阿婆住公屋，容許一個唔係住戶名單既人入住，在扣弟制下已經扣晒分啦，仲邊可以調遷，陳婉嫻有景轟啦；
6. 早十年居港權人大釋法後，教育局都講明唔比學校收班細佬啦，今次咁好死，仲話幫肥仔搵學校，仲唔係政府同陳婉嫻自編自導？
7. 當然仲要加埋已經有好多網友提出過既，陳婉嫻咁高調根本唔係幫緊個細佬的問題啦。