陳方安生提出三大條件呼籲泛民通過政改，講話只要中央願意將公司票轉為個人票、增加民選提委會議席同埋調整四大界別既席數，泛民就應該轉軚投贊成票。
老實講，依三項條件同黃成智提出既都差唔多，但好肯定同一番說話從黃成智口中，轉為陳太口中講出嚟，只係會令到嗰幾項訴求或者條件更加難以實現。
大家諗下，如果中央喺投票前幾曰重施故技，突然講到接納黃成智既提議，話唔定泛民真係有議員心動忍唔住轉軚，搞到政改通過咗。至於立左大功既黃成智？等政府比佢做下委員會主席，唔肯入官場咪攞多幾個公職，咁就乜都搞掂曬，話唔定黃成智先例一開，仲可以鼓勵更多泛民二線政治人物，積極咁用黨員身份喺黨內為政府搖旗吶喊，對中央既統戰工作都幾有利添。
但如果陳太提出類近訴求，喺表決前要求中共讓步，咁個講法就好唔同啦，要知道陳太作為所謂既港英餘孽，過往一直經常用「前政務司司長」個名四出外訪，喺西方國家既官場游走，講述中共點樣走數唔俾香港有普選，以維持佢喺政壇既影響力同地位，用左報既術語就係「唱衰中國」，而喺咁既前提下，如果中央表決前讓步，真係將公司票轉做個人票云云，只會做成「接納陳方安生訴求」既客觀效果，無疑肯定左陳太過往串連外國官府向中央施壓既路線，要中共endorse依種「勾結外國勢力」既禁忌，講話唔定仲難過香港有普選。
所以話，政府俾下著數黃成智，等狄志遠立下功對佢無咩損失，但講到陳太呢……我諗中共真係寧願政改方案維持不變等否決，即係「寧願射落海都唔會益陳方安生」。
要知道喺無群眾壓力同運動既情況下，中央肯妥協讓步，十居其九都係覺得對方有值得收編既價值，同埋肯定對方既路線同埋政治手法，陳太叉隻腳落去「喺八三一決定下通過政改」既討論裡面，同黃成智狄志遠爭住領功，只會令到中共喺八三一框架下利誘泛民既機會更加渺茫，政改更加有機會否決，yeah。