【文：石上樓@精算思政 】
醫學會又再做民調，唔知係咪要做到啱政府心水為止。呢個係好例子，好多時民調要做數都出呢啲手段，列出來等大家小心：
1. 引導問題
之前醫學會民調都只係問支持定反對，簡簡單單冇得出蠱惑。但據聞醫學會就今次民調有人提議加多幾條問題，結果有人力爭之下變番只問一條。
加多啲問題，可以輸咗都拿番咋沙，而且可以加引導性問題，例如某啲團體會問「你同唔同意支持政改讓民主行前一步五百萬人投票選特首」。咁樣好多人會覺得好正面而同意，忘記咗負面嘢。
2. 排除異己
呢招仲毒，唔係唔俾你表態，但係唔包反對我嘅人。即係以前美帝有啲州有普選但黑人就唔可以投票。而家醫學會民調同上兩次唔同，唔受醫學生玩，咁咪即係當呢班傾向公平選舉嘅未來醫生係黑奴？
如果今次再做多次都係輸，阿太早醫生好可能會要求執業廿年以上嘅資深醫生先有份做民調。總之就一定有方法做到阿爺想要嘅結果。
3. 行政阻撓
呢個係第二點嘅變奏，但睇起來文明啲，冇咁粗暴，但一樣有效，其賤無比。
以前美帝某啲州為咗留難黑人，會要求選民出示有相證件、交稅證明甚至要考試，冇講明唔受黑人玩但用行政手段令佢哋投票非常困難。
而家醫學會話會跟憲報上嘅地址去寄民調表。而家咩年代呀？仲郵寄？其實較年輕嘅醫生會多啲轉地址，資深嘅就穩定啲，咁結果就可能會向一邊傾斜。
跟住收唔到張表又話唔俾人再攞，多多限制。明明有權回覆，但係就因為收唔到張表而未能表態。而家科技咁發達，要mark低邊個有表邊個冇、有冇重複話咁易。加下呢個限制擺明想降低回應人數，因為回應多通常不利建制。咁鬼麻煩，學我個醫生朋友話，「睇多兩個症仲實際」。
4. 秋後算賬
主要係記名民調，邊個支持邊個反對一眼睇哂，又方便醫生老闆向下屬代收民調表，你夠唔夠膽唔交俾老闆先？交又夠唔夠膽寫反對假普選？又係嗰句，而家科學昌明，揾調查公司出電子民調又可以不記名又可防止重複交表，又快又正又唔使人手數點解唔用？除咗因為老海鮮唔多回電郵外，仲有呢個代你交表嘅谷票方法。呢啲手法據聞某啲可以用授權書投票嘅公會都幾常見。阿張融喺中資公司攞簽名都係用類似嘅手法。
用咁多小手段，不外乎要做到阿爺想要嘅結果。真正民意如何，阿太早醫生又點會理？嚟緊建制一定不停出假民調，以上四賤招會以不同變種出現，大家要小心提防呀！
=================
原文刊於 立場新聞
https://thestandnews.com/politics/%E6%B0%91%E8%AA%BF%E8%B3%A4%E6%8B%9B/