當我乘坐東鐵時，手機傳來「政府出招‧樓市加辣」的消息，原來是金管局調整700萬以下物業的按揭為按六成，看完第一個感覺：「咁咪仲難上車」，$2,800,000 僅做首期並不是夢境，是香港的現實。
我努力運用「和理非非」的理性思考：金管局為了保住香港的金融體系，預防壞帳，無可厚非。反正我坐緊這條東鐵綫根本去不到火星，火星之旅 加價加按加糖加辣加乜乜 都唔關我事，算了吧，理得佢！
《施政報告》話出售公屋予「買唔起樓」的綠表人士，《財政預算》話貸款俾「需要住所的」居屋業主補地價賣樓，這都是政府「藥石亂投‧是是但但」的假動作，搞吓笑，算了吧，理得佢！
唔係喎，唸唸吓，對於一班無殼鼠民，細價樓交投少咗，越來越多人租小型單位，在租樓或瞓街的兩難下，業主豈不會看準商機，食滑你班鼠民，難道又要加租迫遷？
我已經聽茅台曾講「不期望住在市區，住偏遠D」，日日同班水貨客及自由行迫東鐵，越搬越遠，越搬越細。點解政府唔同時推埋「租務管制」？（註1）顧吓呢班租樓客，理吓租金狂飆的副作用。
好簡單，同出一轍的思維：「理得你」
保住銀行家，上車沒望捱貴租，理得你？
留住水貨客，塞車轆腳沒街行，理得你？
討好北大人，自縳雙臂棄自治，理得你？
最後，東鐵越過獅子山下，沉思的我落車經過 回復了正常的 沙田新城市廣場，
我用 $7,000,000的百萬份之一 買下一筒橡皮糖，品嚐一口「能得利」的滋味。
（註1）租務管制，燃眉之急
（註2）能得利賀年歌（李光洙 X 魯芬）
圖片來源：網上資料