耍花招耍出禍。
大家都知道方丈份人好小器，田少睇嚟都好難全身而退，一眾花生撚拍手叫好，好似睇緊CCTVB 連續劇咁一路睇一路鬧。
係㗎，方丈份人小器，大家都領教過㗎啦。
平時遇著小器鬼，好多時會退讓一步，補多句「你大人有大量」就算，話晒人哋係缸瓦自己係瓷器，免得小器鬼同你來個玉石俱焚，得不償失。
但係今次唔同。
方丈已經嬲豬咗好耐，田少係個出氣袋咋，今次對付佢，全部都係殺雞儆猴嘅戲碼，叫其他走狗醒醒定定，唔好逆阿爺意。當然，無人知道阿爺意下如何，又點避得開呢？
方丈小器大家唔係第一日知，我諗亦唔會有人覺得佢忽然大方，肯去聽人講嘢，突然學識尊重為何物。所以啦，大家要有覺悟，雨傘運動已經去到一個返唔到轉頭嘅地步。依家阿爺話肯妥協的話，肯肯定當中有鬼。
由上世紀二十年代中共建黨到依家，有好多嘢都已經唔同晒。唯一就係復仇心態不變。更得人驚嘅係，復仇兩字對佢哋嚟講，係無時限性的。若然未報，時辰未到而已。
依家全香港人都得罪咗方丈。無錯，係全香港人。反佔中嘅七彩絲帶，你估方丈會記得你今日做過啲咩？尋仇時又會畀你去避過一劫？為咗幾舊水維穩費去幫中共？你真係too simple，sometimes native喇。
依家你同方丈講句「大人有大量」，佢肯定嬲多兩錢重。既然係咪都得罪咗，就唔好諗住對方會無條件真普選畀你。
我諗田少都心裡有數，先會高調叫689抖抖。你估佢又係第一日知方丈小器咩？
對住小器嘅人要爭氣。復仇，係肯定會發生嘅事。既然必定發生，亦無嘢好擔心。背水一戰，爭取普選訴求不特止，仲要堅守立法會最少三分一議席，以防惡法順利通過。依家唔係要同方丈死過，而係要make sure 佢殺我哋唔死。
唔好食花生住喇，留返起等方丈激到爆血管先食啦。
圖片來源：Now News - 新聞