其實呢，我覺得有啲野又不能太煽情太誇張的。唔好講到好似而家佔領的是一個山區偏遠村落連接外界的唯一道路咁啦。
就算你完全唔 fxxking care 有冇普選而只係有準時返工咁「卑微的願望」，你要滿足呢個願望，其實唔難︰連接各區的道路，冇完全封晒；公共交通，已經陸續開通；你唯一要做的，就係早啲、再早啲、更早啲出門口咁解。
唔好話我講風涼話︰我今個星期開始，係比平時早四十五分鐘出門口。係呀，等小巴條龍真係好長，但平時朝早見到地鐵壞車你都會早啲離開屋企架啦。唔好將瞓多幾個字都上綱上線做「人權」、「自由」。
反過來講，你平日相對而言那種生活的「方便」（甚至我覺得只能算係「習慣」，迫地鐵迫車好方便咩完全唔覺），就係建基於大家對整個社會的管治秩序同既定生活安排的「啞忍」。就好似有啲 post 同圖咁講，生活壓力迫人，你會屌，但你有冇諗過衣食住行的荒謬就係源於管治權力的不公？你唔爭取根本改變，就走去屌那些無可避免「干擾」你日常生活規律的抗爭者，咁咪就係另一個 post 話齋︰慣左在籠中的雀覺得出面飛的鳥有病。
有啲舖頭（唔係做金行藥房凌晨三四點都仲開大燈製造光害那種）的確因為佔路影響生意，所以一直有佔領者主動呼籲大家多幫襯小店；但為一般打工仔而言，所謂「妨礙日常生活」，其實就不過係再早啲起身咁解，你 keep 得住準時返工，連份糧都基本唔會少左。俗啲講句，你所承受的，連條毛都不如呀，你居然好意思鬧出面為左你的真正「人權」而風餐露宿飽受壓力的示威者？