葉一知得到鄰家女孩梁美芬*關注( http://goo.gl/mDNJgL )，相信一定葡萄死一班美芬fans。
先利申一下，我自己就好少會用個樣嘅問題嚟攻擊政客，因為我覺得咁樣唔符合我嘅風格。
鄰家女孩點名批評一知兄：「人身攻擊」、「將選舉當成選美」、「以貌取人」、「侮辱了所有女性候選人和選民」，我專登搵番一知兄個短篇故事，逐隻字睇下有幾以貌取人、侮辱女性。
Sorry，真係睇唔到。我估鄰家女孩係將健吾引用高登仔嘅講法同一知兄篇故事混淆咗。我睇來睇去，一知兄個故事根本就冇侮辱梁美芬個樣點點點。
有啲女仔，可能因為好介意自己外表，所以好容易對號入座，佢可能見到故事裡面呢段就上頭，覺得被侮辱：
「去到票站，對住張選票，看見那個鼠樣，我，竟然生起一個萬惡的念頭：我要背叛太太。
這麼多年來，我都是個好好先生，甚麼都依她，也沒有騙過她，但今天，我萌生了騙她的念頭。
當我看到選票上的游蕙禎，一個如此年青貌美、象徵香港未來希望的候選人，我堅定了還在猶豫的想法。」
「鼠樣」算唔算侮辱？鄰家女孩似唔似老鼠？我見過嘅老鼠唔係咁樣，不論係米奇老鼠定出奇老鼠。雖然「鼠王芬」係因為佢選立法會時以滅鼠作為宣傳，咁照計鼠芬都係一個尊稱吧？
當然，中文裡面鼠係一個貶義詞，例如我地話人「過街老鼠」、「獐頭鼠目」，即係話呢個人乞人憎。咁梁美芬乞唔乞人憎？我諗呢個同樣冇關，而係同個人所作所為乞人憎關係大啲。
咁「一個如此年青貌美、象徵香港未來希望的候選人」係咪選舉當選美？文中個頓號，即係男主角認為年青貌美、象徵未來希望係平衡嘅。象徵香港未來希望係咪因為年輕貌美？唔係呀，係因為佢站出來挑戰香港一隻過街老鼠呀。
咁年輕貌美能夠吸引選民算唔算「侮辱女性」？如果我將「年輕貌美」改造「外形俊朗」會唔會侮辱男性？如果個樣冇影響，咁梁美芬個西九新動力、民建聯、工聯會唔駛花咁多錢去製作啲重度PS嘅靚仔靚女海報喇。
（配呢張有梁美芬同曾經響佢辦事處領車馬費做顧問嘅李偲嫣嘅圖，係因為傳統智慧話我地知一個人心地好唔好，有時係有樣睇）
* 鄰家女孩係梁燕城博士為梁美芬拉票時對佢嘅讚美，絕對唔係侮辱。