建制派33條柒頭議員為左等埋發叔，學人玩議事規則，結果玩出個大頭佛：原本諗住CALL法定人數拖延會議15分鐘，變成集體缺席投票。事實證明，議會呢D西方產物對土共黎講一定係水土不服啦，佢地都係比較習慣用掌聲去表達自己。
其實原本泛民27票齊齊整整投票否決政改，呢件事都算可喜可賀，叫做無俾人睇死嘛。不過無人做鬼轉軑，除左阿爺就緊有其他人唔開心啦，泛民團結又洗埋底喎！以後無得捉鬼，重點打殘泛民上位？唔怪知得何秀蘭一句要點法定人數，就一石激起千重浪，俾人屌鳩佢話係鬼啦。
不過屌還屌，都要有D質素，土共就話唔識議事規則姐，點知好多笑鳩個班柒頭議員嘅人都係差無幾，唔識議事規則又要扮專家，有D出POST捉鬼嘅人重要叫做讀過下法律。話你戇鳩怕你嬲，屌之前，搞清楚幾樣野先：
1睇返錄影，何秀蘭叫點算法定人數，已經係敲嚮左5分鐘表決鐘聲，客觀效果就係提醒主席同秘書要數下是否夠人表決，不過就算佢唔提，主席同秘書都要咁做，因為呢個就係記名表決嘅程序；
2簡單D講，何秀蘭呢一句「點算法定人數」，程序上係無意義同效果，因為呢5分鐘嘅鐘聲就係叫D議員返回座位投票嘛！(如果人齊就唔洗點鐘啦！！！) ；
3有人指，何秀蘭一句「點算法定人數」係可能會導致流會(假設唔夠人) ，分分鐘令否決唔成事，乜乜物物。這其實又係信口雌黃。議事規則寫到明，記名點決之際，如果不足法定人數，表決係會無效，但不會導致流會，只係會開始15分鐘來點算法定人數嫁。
不過，何秀蘭話要用呢一句野去留住D建制派議員，呢一個就係策略同政治判斷嘅問題嘞，係十萬火急之下到底有無用，實在難以預測。之但係咁重要既議決，稍為有小小智商嘅議員，如果聽到話點法定人數，可能都會停一停、諗一諗啦！
講到尾，何秀蘭客觀上無整壞件事，實質上又投左否決票，而果陣時又真係一個電光火石，無人知建制派搞甚麼把戲的離奇時刻，大家何苦上綱上線何秀蘭的一個反應，滿口誅心之論，捉鬼云云。
而另外一個屌鳩何秀蘭係鬼的原因重搞笑，就係話佢天人交戰，係泛民最後一個投反對票。不過原來成個表決時間都係20秒鐘。而家D人對政治忠誠的標準真係歷史新高，對民主嘅堅決程度係用秒計，連表決都要20秒內鬥快，要做「民主飛人」！唉，真係話你戇鳩怕你嬲。
不過下年2016係選舉年，港島重要少一席，今舖泛民又咁齊心一票不漏。可能咁樣令到果D鬧同路人為樂的激進泛民唔開心，因而有人要打擊對手都係在所難免嘞，不過何秀蘭呢一單就真係送俾我都唔屌囉。