圖：蘋果日報
今日睇到單私人豪華飛機差少少墜機既新聞，我終於明白點解我地既機場會就黎飽和，或者我地點解要每人夾錢起三跑的真相。
睇番早年民航署數字，原來機場內私人飛機升降由11年6,424架，12年到8,138架，今日報導講到上年已經升到9,117架，3年內增幅成42%，已經佔左香港整體航空升降架次2.3%，成為香港最主要增長的航班類型。
一年佔成九千幾架班次呀大哥，原來一年咁多餘每程兩個接到你1.8萬個有錢佬，如果俾番啲地方出黎俾普通國泰300人機用，現有機場一年就已經接多273萬普通客人，重駛鬼起三跑？
私人飛機咁升法，我地機場既載客效能好快會被日漸侵蝕，拎1400億起埋個三跑都冇用。怪唔之得成日話機場就快飽和乜乜乜，不如將成個赤鱲角機場俾哂你地班漢能蒙能阿里巴巴富豪玩奔支機啦。到時機場清一色都係富豪，香港又可以威威咁吹下自己提昇左幾多競爭力，好冇？
私人豪華飛機霸佔飛香港機場資源，重要不停扮有需求要香港人夾錢俾你起第三條跑道，你班中港富豪既豪華飛機同蝗蟲有咩分別？
無樓又無機既我的確好唔明白，點解有人會咁bad taste要0係私人飛機傾生意架，其實有野唔可以去酒店傾? 成個粉嶺高爾夫球場唔係已經話好重要一定要留俾富豪打golf 傾生意？呢啲就係傳說中既暴發戶嗎？定係佢地有好特別既話題，一定要0係離岸萬里高空傾？
先唔講你墜毀機場對香港既聲譽同競爭力有幾大影響，你知唔知你兩條友自己包一程，已經製造左幾多碳排放污染，加劇全球暖化？
就算你係要破壞地球，係要私人飛機上攪離岸生意派對，都可唔可以死遠啲去石崗機場? 唔好攪到個國際機場亂哂？
但最荒謬既係，點解今日我地個城市，要淪落到為左配合班中港暴發戶既特殊癖好而發展三跑？今日迎合你地既一己私利，明日將是我地國際機場既末日！
要對付浪費香港機場客運資源根本好簡單，我建議應立即發起開徵一程20萬的暴發戶環保稅，一年就多番20億收入作補償。長遠而言應該研究騰空番私人飛機既位出黎俾普通客機，提昇機場承載力，我地要既係一個better 唔係bigger airport，私人飛機行開啦！