近日，有關「懷仔」的新聞，慘不忍睹。剛好收到一則Whatsapp傳來的道理，跟大家分享：
「1. 吳克儉，仲有教聯，見到極右本土派貼街招，就撲出來「非常遺憾」，廣西社團總會單嘢，以交流團作餌引導學生拍撐政改影片，又唔見你哋「非常遺憾」，又唔見你出聲，仲話係個別事件。維護懷仔同其他小朋友，大家唔該一視同仁。
2. 成件事，陳婉嫻如果從社運界團結的前途著想，從一開始就不需要咁高調，全程公開真人騷，為乜？搏掌聲？以嫻姐同政府的關係，其實可以低調做。
3. 聲稱十二歲的懷仔，不論外表，不論佢身世，不論佢有無郁手打過人，最後遣返深圳也好，做咗難民又好，唔使講，就算他只是個「稻草人」，都應該有接受教育的機會。聯合國《兒童權利公約》裡，兒童「發展權」應該包括教育稻草人。不過我又覺得，若懷仔父母健在，遣返是應該的，但調查可能曠日持久，拿「行街紙」時間漫長，不問他是誰，都應該「讀住先」。
4. 聲稱十二歲的懷仔，當年被父母拋棄，輾轉來到香港，無論法治社會程序是否正義，生活了九年，都不是他的錯，是「人大」的錯，他只是一個悲劇，左膠右膠的一場悲劇。
5. 孔夫子教落「不教而殺謂之虐 」，收生何錯之有？況且只是初步評估，可以通過了才反對，就算表達不滿，對象應是政府與入境處，到時堅持「有教有類」就可以。
6. 但是，示威完畢，本土派完成展示任務，又為何不立即派人清理標語，要小學生自己清理，繼續令學生受到不必要刺激？
7. 那個女學生痛哭時，情急說了句「犯咗法又點喎！點解要貼呢啲嘢呀？ 」好多人唔同情「懷仔」我明白，但我知，呢個妹妹一定係關心學校想幫手清潔標語；我全都知道，她只是說話直率，點解唔可以畀一點體諒？點解仲要討論。
8. 點解咁多人對不夠12歲的小朋友，咁多要求，咁多批評？我自己12歲的時候，就同人當街爭嘢玩講口講手；我有位女仔朋友，12歲的時候，就問誰未發聲了。點解今日發聲前，要有咁多質疑與自我審查。
9. 至於很多人說，不能開此先例，等同吸引大批兒童偷渡來港分薄資源。那就向政府施壓、表達不滿，為何把矛頭指向《獨媒》，或者《熱血》，又或者今天仍願意走上街的年輕人。
請不要向反對者抽逆刃刀，不要向雞蛋問責，不要鋤弱扶強，不要反「共」反上腦。」
讀完後，我嘩了一聲，對箇中邏輯嘖嘖稱奇，用Whatsapp語音回了一句「你係咪鬼」，可惜截稿前，暫未獲這一位「消息人士」回覆。