曾經有個5歲小朋友問圖言：
其實點解唔可以「袋住先」？
就算「袋住先」最終真係會變成「袋一世」，
都總好過「冇得袋」吖！
圖言同呢位小朋友講咗個故事：
喺好耐好耐以前嘅某一日，王子終於長大成人，要成家立室喇！佢滿心歡喜去到Cinderella屋企，打算帶佢返皇宮。
一入門口，王子就見到Cinderella嘅後母已經喺度等緊佢。
後母好親切咁同王子講：「王子，我已經為你精心篩選過你嘅候選王妃，就係我兩個寶貝女！而家，你可以按自己心意，自由選擇你最心愛嘅人成為你嘅王妃！」
王子望住兩位候選王妃，即係Cinderella嘅兩位姐姐，嘆咗一口氣。佢哋兩個同樣都係咁刁蠻任性，王子根本唔鍾意佢哋。
「佢哋兩個一樣都咁刁蠻討厭！我都冇得揀，我兩個都唔鍾意！」王子同後母講。
「王子，歷世歷代嘅王室成員都冇權選擇自己嘅伴侶，而家你已經可以自由選擇你嘅王妃，你好應該娶住先！其他事我哋遲吓可以再商量！」後母語重心長咁為王子分析利弊。
王子諗咗一陣，覺得娶住先總好過冇得娶，就隨意揀咗大家姐做佢嘅王妃。
大家姐當選後，王室為佢同王子舉辦咗一個盛大婚禮，全國上下都知道佢就係王妃，而大家姐亦到處大肆宣揚佢自己就係王子親自揀選嘅王妃，係王子一生中最愛嘅女人。挾住「王子最愛女人」呢個名銜，大家姐成日四處蝦蝦霸霸，而其他女子都無話可說。
時間一日一日咁過，午夜夢迴，王子總會後悔自己當初嘅懦弱同短視。佢成日都諗，如果當日佢唔妥協，唔聽後母唆擺娶住先，佢今日仲可以努力爭取自己喺國家之內揀佢愛嘅女子做王妃，甚至唔一定要喺Cinderella屋企揀王妃。只有真正嘅選擇權，先可以俾王子同佢真正心愛嘅女人一齊共渡餘生。不過如今唔娶都娶咗，「娶住先」亦順理成章變成「娶一世」，王子就要同大家姐一齊，痛苦ly ever after咁，過埋佢悲慘嘅一生。
圖言 Facebook專頁：
https://www.facebook.com/speakforthetruth