（玻璃之城劇照）
嶺大音樂會表演樂隊「血汗攻闖」唱咗隻歌叫”Fxxx the Police”，周融個幫港出聲話「毀香港清譽」、新界社團聯會藍鴻震話大學有粗口歌「震驚亞洲」、何君堯話要嶺大解散學生會咁。
呢個世界，有啲嘢用粗口先至表達到神髓。幾時適合用粗口，睇場合同地點。馬恩國響立法會講”not a f_cking Chinese”，要道歉係因為呢句係unparliamentary language，個場合完全唔恰當。
警察執勤嘅時候講粗口要處分，係因為佢地係執勤緊，話時話，佔領期間俾人影到爆粗鬧人嗰啲警察，唔知有冇處分到呢？順便再問問，暗角七警，唔知拉咗未？咁駛唔駛解散警隊？
大學校園嘅搖滾音樂會有樂隊用粗口歌鬧劣跡纍纍嘅警察，算唔算場合唔適當？第一，大學校園係私人地方，大學生都係成年人，呢個rock show係成年人出入嘅私人地方活動。第二，rock show聽到粗口，其實真係唔出奇。要rock show聽唔到粗口，除非係中小學或者青少年中心搞。
咁一定有人鬧大學生講粗口就係讀屎片。Well，好多自稱Vintage年份畢業、係”We’re the best”嘅戰後嬰兒潮港大人，講到啲人響Hall度表演幾十字粗口嘅事蹟，仲係津津樂道，張婉婷套浮誇大作《玻璃之城》，仲係攞呢樣嘢當浪漫情節一部份。
如果大學校園有Rock band唱粗口會「毀香港清譽」、「震驚亞洲」，咁唔該快啲禁止《玻璃之城》DVD響市面流通。如果個亞洲咁樣俾係震驚到，你當嶺大係小學，定係亞洲人係小學生？
連結：
新社聯：震驚亞洲（連結）
幫港出聲：毀香港清譽（連結）
法政匯思：演唱歌曲含粗言穢語 不代表違《公安條例》（連結）
（呢幾句俾啲閱讀理解比較差嘅人睇：嗱，唔好屈我話我覺得講粗口大晒教壞細路呀，我講咗睇場合呀。如果我工作期間爆粗，我絕願贊成處分架。）